Bataferð hetjunnar

Námskeið sérsniðið fyrir konur í Dyngjudeild haldið 17. – 19. maí í Bríetartúni 13, 2. hæð. Kennt er fös. 17. maí kl. 18:00-22:00, lau. 18. maí kl. 10:00-14:00 og sun. 19. maí kl. 10:00-14:00.

Hámarksfjöldi: 16.

Sjá skráningarupplýsingar hér að neðan.

Takið eftir: Námskeiðinu hefur verið frestað fram á haust.

Hetjuferðin

Ferð hetjunnar eða hetjuferðin (The Hero´s Journey) er þekkt hugmyndafræði sem oftast er tengd við bandaríska goðsagnafræðinginn Joseph Campbell.

Björg Árnadóttir, rithöfundur, ritlistarkennari og sporakona, hefur á undanförnum árum kynnt sér hetjuferðina í stóru Evrópuverkefni sem heitir HIT – heroes of inclusion and transformation (2017-2019). Hún er þegar farin að nota aðferðina í kennslu sinni, annars vegar í ritlistarkennslu þar sem hún notar hetjuferðina til að hjálpa höfundum við uppbyggingu verka sinna og hins vegar á námskeiðum sem snúast um sköpun og sjálfskoðun.

Komið hefur upp sú hugmynd að Björg noti aðferðir hetjuferðarinnar til að vinna með sporakonum í bata enda endurspeglar hetjuferðin sporavinnuna. Í stórum dráttum fjallar hetjuferðin um það að hetja lendir í ævintýrum sem umbreyta henni. Hafðu í huga þegar þú lest eftirfarandi lýsingu að umrædd hetja gæti bæði verið aðalsöguhetjan í bók/kvikmynd eða þú sjálf sem söguhetjan í þínu eigin lífi:

Hetjan er stödd í venjulega lífi sínu í landi hins þekkta. Allt virðist gott en þó er eitthvað undirliggjandi sem truflar hversdagslegt lífið. Það kemur að því að hetjan heyrir kall til breytinga (en kallið getur birst á afar ólíkan hátt, verið innra kall jafnt sem ytra kall). Hetjan heyrir kallið er ekki tilbúin til að hlýða því strax enda reynir bæði ytra og innra umhverfi hennar að koma í veg fyrir að hún taki breytingum. Það er ekki fyrr en hún hefur horfst í augu við hindrunarmeistara sína að hún getur hlýtt kallinu og tekið skrefið inn í ævintýrið, land hins óþekkta. Þar mæta henni ögranir og hindranir og á vegi hennar verður fólk og fyrirbæri sem ýmist reyna að hjálpa henni eða hindra. Hetjan tekst á við verkefnin sem stundum eru svo krefjandi að hetjan fellur niður á hyldýpi og deyr þar táknrænum dauða. En eftir slíka eldskírn lifnar hún við aftur og þegar hún hefur spyrnst sér upp frá botninum hefst ferðalag hennar tilbaka til fyrri heimkynna. Hún þarf að fara í gegnum friðþægingu til að ná sáttum og hún öðlast gjöf sem hún tekur með sér aftur til land hins þekkta þar sem fólk fagnar henni sem breyttri manneskju.

Kannastu við þessa sögu úr eigin lífi eða úr heimi bókmenntanna? Kannastu kannski við að hafa farið í þetta ferðalag í edrúvinnunni þinni?

Á námskeiðinu verður unnið með land hins þekkta, kallið, hindrunarmeistarana, land hins óþekkta, hyldýpið, sáttina, umbreytinguna, gjöfina og endurkomuna í land hins þekkta eftir því sem tími vinnst til. Það ræðst af vilja hópsins hversu hratt verður farið yfir. Notaðar verða margskonar skapandi aðferðir sem tengjast ritlist, leiklist, myndlist og hugleiðslu en einnig tala þátttakendur saman um reynslu sína í smærri og stærri hópum.

Sporakonum býðst námskeiðið á hálfu verði, 18.000 kr., en Dyngjukonur hafa forgang. Flest stéttarfélög niðurgreiða námskeið Stílvopnsins.

Vinsamlegast leggið 18.000 kr. inn á reikning Stílvopnsins

0133-26-580815

kt. 580815-1380

eða borgið með korti

Kvittun verður afhent við upphaf námskeiðs (en fyrr ef þú þarft á því að halda til að fá endurgreitt úr stéttarfélagi).

 


Map Unavailable

Hvenær?
Date(s) - 17.5.2019 - 19.5.2019
18:00 - 14:00

Skráning

Bookings are closed for this event.

Scroll to top