Hetjuferðin 27. feb.-20. mars

Um námskeiðið

Hetjuferðin (Hero’s Journey) er þekkt hugtak úr frásagnarfræðunum en einnig leið til sjálfskoðunar og aukins þroska.

Á námskeiðinu er hugmyndafræðin að baki ævafornrar Hetjuferðarinnar kynnt og hetjuferðir skrifaðar; hvers kyns sögur sem fylgja hetjunni á ferðalagi hennar, sögur úr eigin lífi jafnt sem skáldaðar fantasíur.

Formið er frjálst og þótt flest skrifi sögur kjósa sum jafnvel að kynnast hetjuferðinni með aðferðum ljóðlistar og leikritunar. Enn önnur koma einkum til að kafa í hina merkilegu hugmyndafræði.

Hetjuferðin gæti virst vera formúluskrif er námskeiðið er svo sannarlega óvissuferð.

Í upphafi veit enginn hvert hann stefnir og alltaf er eitthvað um það bil að fara að gerast. Höfundum tekst þó undantekningarlaust að komast óhultum á leiðarenda, reynslunni ríkari.

Hvað er Hetjuferðin?

Ef grannt er skoðað fjalla flestar sögur heims um ævintýraferð  hetjunnar og þroskaferðalög okkar sjálfra:

Hetjan í sínum þekkta heimi heyrir kall til breytinga. Til að geta  hlýtt kallinu þarf hún að horfast í augu við það sem hindrar hana en stígur loks inn í óþekktan heim ævintýrisins þar sem bíða hennar ögrandi þroskaverkefni. Hetjan tekst á við áskoranir og deyr jafnvel táknrænum dauða en rís upp og öðlast gjöf í ferli friðþægingar og sátta. Umbreytt snýr hetjan aftur til síns heima með gjöf í farteskinu sem gagnast samfélagi hennar öllu. 

Á námskeiðinu er fléttað saman hugmyndum goðsagnafræðingsins Joseph Campbell, geðlæknisins Carl  Gustav Jung og handritshöfundarins Christopher Vogler en bók hins síðastnefnda, Ferð höfundarins (1992), kom af stað flóðbylgju fantasíubókmennta og -bíómynda.

Á þessu ævintýralega námskeiði fléttar Björg Árnadóttir ofangreindar hugmyndir um hetjuferðina saman við fjörutíu ára kennslureynslu sína.

Hlaðvarpsviðtal um Hetjuferðina.
Umbreytingarævintýrið: Sjónvarpsviðtal um Hetjuferðina o.fl.

Fyrirkomulag námskeiðs

Fim. 27. feb. kl. 18:00-22:00: HETJAN
Kynning á hugmyndafræði Hetjuferðarinnar. Upphitun með aðferðum sem hrista þátttakendur saman og hjálpa þeim að setja sig í spor hetjunnar. Skrifað og skrafað um hetjuna frá ólíkum sjónarhólum.

Fim. 6. mars kl. 18:00-22:00: HETJAN OG HINDRANIRNAR
Hetjan horfist í augu við hindranir sínar áður en hún tekur skrefið inn í hinn óþekkta heim.

Fim. 13. mars kl. 18:00-22:00: HETJAN OG HEIMUR HINS ÓÞEKKTA
Skrifað um ævintýri, þroskaverkefni og eldskírn hetjunnar í hinum óþekkta heimi.

Fim. 20. mars 18:00-22:00: HETJAN, HEIMFERÐIN OG GJÖFIN
Áfram er skrifað um hinn óþekkta heim þar sem hetjan, í ferli friðþægingar og sátta, öðlast gjöf sem hún snýr með aftur til síns heima.

Ekki eru lögð fyrir heimaverkefni en þátttakendum er frjálst að skrifa að vild milli skipta.

Ummæli

Hópurinn í mars 2024:
Við erum ekki söm. Það urðu ákveðnir töfrar. Kennslan leiðir okkur svo víða, dyrnar opnaðar á listilegan hátt og húmor varðar leiðina. Trúnaðartraust skapaðist og áskorun ferðalagsins efldi okkur í að tileinka okkur þessa sýn sem gaf okkur alveg ótrúlega mikið.

Hildur Helgadóttir (Hetjuferðin, 2018):
Frábært námskeið! Hetjuferðalagið færir manni hjálplegan og kærkominn ramma utan um lausbeislaðar og tilviljanakenndar hugmyndir. Góð leið hvort  heldur til að skálda eða skoða eigin lífsgöngu og skilja ýmislegt betur.

Nánari upplýsingar um námskeiðið: bjorg@stilvopnid.is / s. 899 6917