Skrifað með öllum skilningarvitum á Indlandi 29. okt.-13. nóv. 2026
220.000 kr.
EINSTAKT TÆKIFÆRI TIL AÐ VERA EINS OG HEIMA HJÁ SÉR AUSTUR Á INDLANDI!
Miklar upplýsingar fylgja þessari óvenjulegu ferð sem í stuttu máli eru þessar:
Námskeiðið er 38 klst. og stendur yfir átta af þeim fimmtán morgnum sem dvalið er á Secret Garden í Kochi, Kerala. Með dreifðum greiðslum er Stílvopninu greitt námskeiðsgjaldið (220.000 kr.), hótelinu gistingin (80-150.000 kr. m/morgunmat f. 15 nætur) og völdu flugfélagi flugið.
Flugið er á eigin vegum en flest hyggjast verða samferða út. Sætin 16 eru óðum að fyllast. Hægt er að framlengja og taka með sér félaga sem ekki situr námskeiðið.
Dagana 29. okt.-13. nóv. 2026 stendur Stílvopnið í þriðja sinn fyrir hæglætisferð til Kochiborgar í Kerala, syðsta fylki Indlands. Hópurinn dvelur hjá Þóru Guðmundsdóttur á Secret Garden hótelinu og rannsakar umhverfið, eigið ímyndarafl og innra líf undir stjórn Bjargar Árnadóttur, ritlistarkennara.
Ferðin er fyrir þau sem langar að kynnast Indlandi með öllum skilningarvitum og uppgötva um leið eigin höfundarödd í heilsusamlegu umhverfinu. Námskeiðið er fyrir byrjendur og lengra komna líkt og jógatími þar sem fólk einbeitir sér að eigin færni og vellíðan án samanburðar við aðra.
Pláss er fyrir 16, unga og aldna, konur, kvár og karla. Í fyrri ferðum skapaði fimmtíu ára aldursbilið skemmtilega fjölbreytt samskipti og skrif.
Taka má félaga með í ferðina sem ekki situr námskeiðið.
Hæglætiferð til Kerala er góð hugmynd
Námskeiðslýsing
er neðar í síðunni.
Fyrirkomulag
Námskeiðið (38 klst.) stendur yfir 8 af 15 morgnum á Secret Garden, 4 klst. í senn. Auk þess upphitun áður en lagt er í hann og upplestur á hótelkvöldvökum.
Um miðbik dvalar er nokkurra daga hlé sem nota má til ferðalaga eða frekari skrifa.
Lengja má ævintýrið í báða enda með ferðalögum á eigin vegum eða í félagsskap hinna. Hótelið veitir upplýsingar um áhugaverða áfangastaði og aðstoð við að komast þangað.
Skipulögð ferð á eigin vegum
Þátttakendur greiða Stílvopninu námskeiðið, Secret Garden gistinguna og flugfélaginu flugið. Greiðslur dreifast frá skráningu fram á komudag.
Fólk kemur sér sjálft á áfangastað. Flest þeirra sem þegar eru skráð ætla þó að verða samferða út. Þrátt fyrir stöðu heimsmála virðist örugga og ódýra flugleið frá Amsterdam um Mumbai til Kochi, vera að finna. Upplýsingar þar um birtast hér bráðlega
Ferðalangar þurfa eigin ferðatryggingar.
Verð og greiðslufyrirkomulag
Námskeið
220.000 kr.
40.000 kr. óafturkræft staðfestingargjald, tvær greiðslur í viðbót fram á sumar (endurgreiddar fram í miðjan september).
Gisting Secret Garden (15 nætur með morgunmat)
80.000 – 150.000 kr/mann (verð ræðst af vali)
25.000 kr. fyrirframgjald við skráningu, annars greitt við komu.
Flug
Verð ræðst af vali (sjá klausu hér að ofan).
Greitt þegar þér hentar.
Ákaflega ódýrt er að dvelja á Indlandi og flest sem freistar kostar aðeins brot af íslensku verði.
Sum stéttarfélög niðurgreiddu fyrri námskeið.
Nánari skýringar á verðum HÉR
Veður
Nóvember er góður mánuður en þá hefst þurra árstíðin með dagshita á milli 29-32°C.
Gest- og gleðigjafar
Björg Árnadóttir, rithöfundur, ritlistarkennari og MA í menntunarfræðum skapandi greina, kennir.
Þóra Bergný Guðmundsdóttir, eigandi Secret Garden, er gestum innan handar í Kochi.
Skráning
Þú færð sendar nánari upplýsingar og þarft ekki að greiða við skráningu – flettu bara framhjá greiðslusíðunum.
Viltu spjalla? Björg s. 899 6917 / bjorg@stilvopnid.is
Nánari lýsing
Myndir úr ferðum ’23 og ’25.
Úr kennslustund haustið 2023
Indlandsævintýrið – námskeiðslýsing (38 klst.)
Við byrjum á félagsörvandi æfingum til að kynnast, byrja að skrifa og skapa saman örggt umhverfi til að vaxa og þroskast í skrifum okkar.
Þá horfum við inn á við í æfingum sem fjalla um ævi okkar og innri mann.
Að því loknu opnum við fyrir öll skilningarvit í leiðangrum um umhverfið; skrifum um það sem við sjáum, heyrum, snertum, skynjum, brögðum og lyktum af auk samskipta okkar við innfædda og viðbragða okkar við öllum þessum upplifunum.
Því næst skoðum við aðferðir sagnaritunar og skrifum sögur sem leiða okkur að frásagnarlíkani Hetjuferðarinnar (The Hero’s Journey). Við leitumst við að nýta okkur það sem við lærðum í fyrri skrifum en bæta afli ímyndunarinnar við.
Í lok námskeiðs fléttum við saman staðreyndum, upplifunum, tilfinningum og ímyndunarafli í vandaðri grein eða færslu um valið efni úr ferðalaginu (ferðaskrif).
Hver fjögurra tíma fundur hefst með innlögn (verkefni lagt fyrir og um það rætt í hópnum), verkefnin leyst (stundum í áföngum) og skrifunum deilt. Þegar þess er þörf er hópnum skipt og unnið í minni hópum.
Textar eru líka lesnir á kvöldvökum og skrifin eru auk þess óhjákvæmilega rædd í dagsins önn.
Sérstaklega er mælt með lestri bókar Arundhati Roy, Guð hins smáa, sem gerist í Kerala.
Jógatímar eru í boði á hótelinu áður en kennsla hefst alla morgna.
Umsagnir
,,Í hópnum skipti hvorki bakgrunnur né aldur máli. Dýrmæt þykja mér þau kynni og margt af því sem ég hef lært af Björgu og hópnum mun ég taka með mér og raða vandlega í verkfærakistu lífsins. Á námskeiðinu hef fengið að kynnast gagnlegum ráðum til að nálgast betur meitlun máls og hugsana. Reynsla og þekking Bjargar á viðfangsefninu er framúrskarandi og fagleg, byggð haldgóðri þekkingu frá henni og öðrum fræðimönnum á þessu sviði.“
Alda Árnadóttir verkefnastjóri hjá skóla- og frístundasviði Reykjavíkurborgur
,, … og svo líka bara að hlusta á alla hina, að vera í hópi, það er svo magnað. Ég hef haft þessa hugmynd um að rithöfundurinn eigi að vera lokaður einn uppi í turni en í þessu umhverfi meikar það fullkominn sens að vera með öðrum í hópi, að hlusta á það sem hinir segja og bera skrif sín undir aðra.“
Steiney Skúladóttir spunaleikkona og sketsahöfundur
,,Mér finnst þetta alveg stórkostlegt. Þegar ég segi að ferðin opni nýjar víddir hugsans meina ég að auðvitað er hugurinn þarna, síkvikur, en þú hjálpar mér að leysa úr læðingi krafta sem ég vissi ekki einu sinni að væru þarna.“
Ragnhildur Hjaltadóttir, fyrrv. ráðuneytisstjóri
Nokkrar myndir frá námskeiðunum ’23 og ’25
